網上搜奇：網友玩嘢《神奇４俠》列三級
最近有唔少市民唔滿意影視處審理淫褻物品上嘅處理手法，有市民仲投訴《聖經》不雅，令當局亂晒龍。早兩日我阿Net上網又見到另一位市民玩嘢，指最近上映《神奇４俠：銀魔現身》﹝Fantastic Four: Rise of the Silver Surfer﹞內容不雅，要求影視處將電影列為三級。
違背自愛觀念
呢位叫「電眼王子」嘅網民，最近喺香港討論區發帖，話《神》片有大量「暴力、露體、邪教儀式等意識不良的情節」，因為全片大部份時間都專注拍攝一位名叫「銀魔」嘅滑浪手，佢話銀魔「赤身露體於大城市內裸奔，有鼓吹露體之嫌，意識嚴重不良」，真係虧佢諗到。
呢位網民仲話基斯伊雲斯﹝Chris Evans﹞所飾演嘅霹靂火「經常引火自焚，情況跟白蓮教﹝古時嘅邪教﹞同義和團所宣揚嘅『神功護體』如出一轍」，佢認為情節同社會提倡愛護自己、珍惜生命嘅正確價值觀背道而馳，於是向影視處投訴，希望將電影立即列為三級咁話。
不妨當笑話看
阿Net好欣賞呢位「電眼王子」嘅想像力，連唔少網友都話好佩服佢，網友雙子座撒卡話：「啲人係又投訴，唔係又投訴，最慘係影視處又受喎。」最好笑係網友ktcy917話：「咁超人係咪鼓吹將under着喺面？」雖然唔知佢嘅投訴最後成唔成功，版主將呢篇原本喺電影區發嘅帖，移咗去「有趣電郵及笑話」欄目中刊登，因此當做笑話睇吓亦無妨。
網友投訴銀魔裸跑
版主：阿Net
本欄逢周一至五刊出
